فاكر؟ مايكل عادل

 

فاكر؟
عارف كام ضُلّيلة فرحة
...
قلبي أخَدها ف ضربة شمس؟
فاكر كُل قصايد الهَمس؟
...فاكر لون الشجرة الطارحة؟
فاكر كانت بنت بطرحة
و كإن التفاصيل بالأمس
فاكر ضرب الشوم ع الضَهر؟
فاكر ريحة الخل الطاهرة؟
فاكر أول يوم في مظاهرة
لمّا هَـتـَفـنا فـ عز الضُهر؟
كُنا جميعاً نشبه بعض
وشّنا فيه علامات الصبر
عُمري ما شُفت هناك بهوات
ولا أصحابنا البهلوانات
كُل طلبنا العيشة الحُرة
كُل أملنا تعيش الثورة
فاكر جيبي الفاضي يوميها؟
فاكر؟
كُنت بفكّر فيها
فاكر لما قالولنا نَجَحنا؟
كانوا بيقولوا علينا...
إحنا
مين دلوقت اللي بيتكلّم؟
مين ده اللي بيحتفل النصر؟
مين دلوقت اللي بيتألّم؟
مين اللي بيترمي في السجن؟
ياللي اشتروا بدمانا السُلطة
ياللي ابتدوا بجراحنا الحُكم
ياللي سرقتوا الفرحة بغلطة
ياللي رميت في العسل السم
إعرف ان الضربة الجايّة
أكبر مـ الضربة الجويّة
ياللي حَبَست حَمام في الغيّة
عُمرك ما هاتحبس في الحِلم