مصطفى إبراهيم

البقاء لله يا صاحبي
شد حيلك...كله فاني...
و إبقى قول لو عوزت حاجة
وإنت عارف فين مكاني...

...

وإحنا أهل مفيش كسوف
حد ضامن الظروف؟
وإنتا عارف عيني ليك...
وإحنا عشرة و عيب عليك

إنت خيرك برضه سابق
وإللي بيننا مش شوية...
إللي راح كان زيّ أخويا
وكان جدع و يخاف عليا...

وكنت أحس إيه مضايقُه
وهوّ جايّ من بعيد...
كان فاهمني زيي و أكتر
كنت أنا صاحبه الوحيد
من و كنّا صغيرين..
إتناقشنا ف كل حاجة
كورة.. فن.. سياسة.. دين
وله معايا ميت حكاية
وذكريات ملوّ السنين..
ربنا يجمع ما بينّا ف حتة أحسن....
قول آمين...!!
*************
اللي فات...
نَصّ تلغراف وصلني من ساعات...
كان عزا نُصّي اللي عايش...
ليّا ف النُص اللي مات...